من قزازة مانكير واحدة اعملى عدد لا نهائى بالصور..الحلقة التالتة :)

السلام عليكم ورحمة الله
ازيكم جميعا يا اخواتى العزيزات وكل سنة وانتوا بألف خير العيد على الابواب
النهاردة هقولكم طريقة حلوة قوى وبسيطة لعمل عدد لا نهائى من الوان المانيكير من قزازة واحدة
انا بعتذر انى اتاخرت لانى والله مش باخرج من البيت الا نادرا وكمان فضلت ادور على ضوافر عدلة فى عيلتنا تنفع اطبق فيها الطريقة علشان الشكل العام فى المنتدى مالقتش

وانا منهم انا ضوافرى ممكن تجيبلى حظر لو المراقبات شافوها
مالقتش قدامى غير بنات اخويا ارحم ضوافر فينا
المهم الفكرة الاساسية للموضوع ده يا جماعة هتلاقوها على فيديوهات كتير على اليوتيوب
وانا شوفت واحد منهم وهوعبارة انك تضيفى لون شادو على قزازة بيزكوت الشفاف ده وتقلبى لحد ما يتقطع نفسك وابقى قابلينى لو اتمزجوا
قولت لنفسى ايه وجع القلب ده ماهو لو على لون واحد طيب ماروح اشتريه واخلص!!!!!
الصعايدة اللى انا منهم طلعنا احوط من الاجانب يا جماعة وعملت الاتى:

اولا دى الادوات اللى مستخدمة وهى قزازة بيز كوت او مانيكير شفاف واى لون شادو يخطر فى بالك وفرشة واخيرا ايد بشرية ويستحسن تكون ليها ضوافر




بعدين تجيبى غطا صغير وفيه شوية مايه وتبلى الفرشة كده


بالفرشة المبلولة دى تبتدى تمشيها فى الشادو لحد ما يتمزجوا مع بعض


وتلونى الضافر نفسه بقى بالشكل ده بس ملحوظة هتشوفوا صور ليها العجب علشان انا اخيب خلق الله فى حكاية المانيكير دى بطلع بره الضافر ومش بعرف اوزعه فعلى قد ماقدرت يعنى


وبعدين بقى عادى خالص تحطى طبقة البيزكوت على الضوافر وفيه ناس بتحط طبقة تانية بعد ماينشف الاولى



ودى بقى باقى بنات اخويا والالوان اللى اختاروها
منار اختارت اخضر



وندى دهبى


ومريم الصغيرة عايزة نبيتى وكان مش عندى ركبتهولها لون احمر وتاتش شادو اسود وعلشان كده بقولك ماتكتفيش بالالوان اللى عندك ممكن تمزجى بين لونين واكتر ويطلعولك لون جديد


وحاولت برضه اعمل الفرينش هو فيه ملامح منه مش كده


الفكرة دى يا جماعة حلوة قوى للى عنده اطفال زيى انا ماشاء الله عندى 6 فى البيت (4بنات اخويا و2بنات عمى) بيحبوا ضوافرهم تبقى تكنى كلر وكل عيد كنا على الاقل بنشترى 3 الوان مانيكير لكن دلوقتى خلاص
وكمان مسلية خالص البنات بيعتبروها حصة تلوين لما يختاروا الوان غريبة ويحطوها
انا كده خلصت وكل سنة وانتوا طيبين يارب وعيد سعيد على الامة الاسلامية
جملة اخير هموت واكتبها من ساعة ما ابتديت اكتب مواضيع وشوفتها فى مواضيع كتيييير هنا :-
لا اسامح اللى هتاخد صورى من غير اذنى تربيزة الانتريه بتاعى مش عايزاها تتكشف على منتديات غريبة ههههههههههههه
انا بهزر طبعا بس كان نفسى اكتبها بدل مايطقلى عرق ولا حاجة اهون عليكم؟
يلا بقى لكيت كتير فوتكم بعافية اموووووواه
تعديل وتوضيح بسيط بناءا على استفسار محلوة وتعليق نسرينا
الشادو لما بتحطيه على ضافرك تسبيه لما ينشف علشان لما تحطى البيزكوت مايطلعش اللون فى الفرشة
والبيزكوت ده اللى بيقولوا عليه مقوى اظافر لو واحدة يعنى ماتعرفش ايه البيزكوت ده دلوقتى ماشاء الله اتمدن وخد الجنسية وبيقولوله يا بيزكوت تعالى يا بيزكوت روح ولسه هيتسمى ايه تانى؟!!!
لو فيه اى استفسار انا تحت امركم