المكياجات اللى عندى و جربتها و ايى فيها و انتم كمان

هاى يا فتوكات وحشتونى جدا جدا جدا
انا فكرت اننا نتكلم على المكياجات اللى عندنا و جربناها و نقول راينا فيها علشان نساعد بعض و نعرف ايه الكويس و ايه الوحش
و نتكلم على كل حاجة من كريم الاساس و حتى الارواج و المانيكير و ياريت لوكان بالصور كمان
و يارب الموضوع ما يكونش متكرر و يعجبكم
و انا هبدء بنفسى و المكياجات اللى عندى بس معلش اعذرونى على الصور لانى معنديش كاميرا فى الوقت الحالى
ان شاء الله اعمل موضوع قريب و اصور فيه مكياجاتى علشان اوريهالكم

عموما يلا نبدا

فى كريم من كفر ديرم اسمه سكين بيسكس و ده كريم مرطب بستخدمه تحت كريمات الاساس بالذات اللى بتجف و مبتحتاجش لبودرة فوقيها لانها بصراحة بعد ةلما بحطعا وشى بيبان انه جاف جدا و الكريم دة بيخلى منظر وشى حلو و ناعم و على فكرة هو مش دهنى يعنى مش بيخلى بشرتى تزيت و لا تلمع و لا تعرق زى الكريمات المرطبة التانية

اولا بالنسبة لكريم الاساس

انا عندى ثلاثة دلوقتى
الاول من بلاديو و هو مصنوع من الاعشاب الطبيعية و ده باكثر من 150 جنيه اللون طلع اغمق منى شوية لكن انا ممكن استعمله عادى هو من النوع اللى لما تحطيه يجف بسرعة و مش محتاج لبودة فوقه وده طبعا ما ينفعش للبشرة الجافة ابدا اول لما استعملته كام مرة كان حلو اوى لكن بعد كده طلعلى جبوب فى وشى بس انا اصلا عندى حساسية من حاجات ملهاش عدد و بتطلعلى حبوب من حاجات الناس التانية يتستعملها و عادى جدا مش بتطلعلهم حبوب و لا حاجة يعنى المشكلة فيا انا مش فى كريم الاساس لما حطيته لصاحبتى كذا مرة مطلعاهاش حبوب و لا اى حاجة عموما انا بنحه بيه للبشرة الدهنية اكثر و على فكرة تغطيته متوسطة و هو من النوع سائل و بيدى مظهر طبيعى جدا


التانى من ايسادورة اسمه الفيلفت تاتش هو برضه من النوع اللى بيجف بسرعة على البشرة و مبيحتجش بودة فوقيه هو حلو جدا تغطيته متوسطة لانى مش بحب كريم الاساس تكون تغطيته كاملة لان بشرتى مفيهاش عيوب كتير مبنصحش بيه لاصحاب البشرة الجافة برضه ممكن البشرة العادية يكون مناسب ليها اكتر و هو من النوع سائل و بيدى مظهر طبيعى

التالت من بورجوا و هو المنيرال مات ده اسمه و هو اللى فى علبة زى علبة الكريم و هو موس يعنى مش سائل و مش كريم هو زى دريم مات موس بتاع ميبيلين
هو تغطيته تعتبر متوسطة برضه و بيدى مظهر طبيعى جدا و كانك مش حاطة اى حاجة بس مش بنصح بيه لصاحبات البشرة الجافة محتاج لبشرة عادية او دهنية و ده برضه مش بيحتاج لبودرة فوقيه لانه خالى من الزيوت و هو ده اكثر واحد بحبه من الثلاثة

اه نسيت اقولكم انى جربت السمر كيك و بصراحة لما افرنه مع كريمات الاساس اللى عندى بصراحة اسوء شئ حطيته على وشى على الاطلاق اولا السفنجة اللى معاه الكبيرة دى متنفعش خالص استخدمته مع سفنجة تانية كان لازم انى ابل السفنجة و اعصرها على علبة البودرة نفسها و اقعد ادعك السفنجة فى البودة جامد علشان يادوبك اطلع شوية منها و بهد ماحطيها على وشى بعد عناء لان كان فيه اماكن فيها بودرة اكتر من التانية و كان وشى ملطش المهم بعد ماوشى نشف لقينى زى مااكون حطيت جبس على وشى و شكلى مش طبيعى بالمرة و حاسة ان وشى زى مايكون مشدود و جاف جدا و بصراحة كانت وحشة جدا و على فكرة دى كانت الفليبينية الاصلية و كانت بحوالى اربعين جنيه

نيجى بقى للكونسيلر
اولا انا عمرى ماجربت كونسيلر و طلع حلو ابدا مش عارفة ليه
انا عندى واحد كان جاى ضمن علبة مكياج كبيرة كان هدية من الكويت من ماركة ايطالية اسمها just gold و هو ده الوحيد اللى بيغطى الهالات السوداء شوية يعنى بس برضه بيدينى اللى انا عاوزاه كمان بحس انا صعب انى اوزعه كويس تحت عينيا بس ماشى حاله يعنى
و عندى من نيفيا الاتنين الكونسيلر اللى عند نيفيا مفيش غيرهم و الاولانى اللى هو السائل اللى موجود فى قلم كدة ده و ده خفيف جدا جدا و مبيغطيش الهالات ووحش اوى
و التانى اللى هو الاستيك القلم برضه تغطيته خفيفة جدا و مبيغطيش الهالات السوداء بس لما حطيته لصاحبتى و هى الهالات السوداء اللى عندها اقل من اللى عندى شوية و بشرتها دهنية كان حلو عليها و غطلها الهالات السوداء
و على فكرة الاتنين اللى من نيفيا بيجفوا يعنى من كريميين يعنى محتاجين لوحدة بشرتها دهنية و الهالات السوداء عنها قليلة بس كمان هما بيدوا مظهر طبيعى جدا و تحت العين يعنى مش تقال زى القناع و لا حاجة

و عندى كونسيلر من ديور كلكم عارفين طبعا ان ديور دى من اغلى و اشهر و احلى الماركات لكن الكونسيلر بتاعهم برضه مش حلو مش بيغطى الهالات السوداء و حسيت انه عادى جدا جدا جدا و مخيستاهلش اللى اندفع فيه

نيجى بقى للبودرة
عندى بودرة من ديور دى حلوة جدا معلبيهاش كلام و انا ساعات بستعملها لوجدها من غير لاكريم اساس و لا كونسيلر و بتتطلع جميلة و منظرها طبيعى جدا و هى ناعمة اوى و انا مبسوطة بيها يارب متخلص لانى معييش فلوس اجيب واحدة تانية

و عندى بودرة من بورجوا و دى تعتبر خامتها اوحش شوية من ديور طبعا لان ديور ماركة غالية جدا و بورجوا تعتبر من الماركات الرخيصة بره بس هى برضه حلوة جدا و ناعمة و منظرها طبيعى على الوش و يتؤدى الغرض

و عندى بودرة من اماندا و دى رديئة جدا و مش ناعمة على الوش و منظرها مش طبيعى خالص ووحشة جدا

انا هكتفى بالحاجات اللى اتكلمت عنها دى مؤقتا لحد ما اشوف مشاركة و تفاعل منكم و انتم كمان تحكولنا على الحاجات اللى عندكم و رايكم فيها
و ان شاء الله لو لقيت مشاركات كتيرة و تفاعل منكم اكمل
انا لسة عندى حاجات كتيرة عايزة اتكلم عنها